جاني خبر دارت هواجيس وافكار
وقررت نطوي بالسفينه شراعي
كني على الامواج والبحر غدار
نعيش والا نفترق يا سواعي
الحجر صعب وكله احلام واسرار
لاتنشرى ايامه ولاهي تباعي
قالوا كورونا كم يخلف من أضرار
وكم في البشر ياكم شرى له وباعي
الحكم صعب وتنتظر حكم الاقدار
وتعيش في نفسك كثير الصراعي
الارض من حولك تحاول وتحتار
وتناظر الوادي وذيك المراعي
ويمر حولك من قرايب ولك جار
وانته بعيد القرب مافيه داعي
خوفي على اللي ساكن القلب والدار
حتى ولو زاد الشقا والتياعي
تشوف في عين المواليف الاصرار
وكلاً تنازل لك وكلاً يراعي
واللي لها في القلب قيمه ومقدار
ماقصرت حولي بما يستطاعي
اسمع خطاك بنبض قلبي وكم دار
ماتعرفين الزيف والا الخداعي
وقفت يوم الناس ولون الادبار
وتناظري عيني وترجي سماعي
مهما نقدم شكر ونقدم اعذار
افعالكم للناس لازم تذاعي
جزاك رب البيت وتطول الاعمار
على الغلا يازين كل الطباعي
مريت بالفرحه وقاسيت الامرار
وبذكر رب البيت كان اقتناعي
والحمد لله زال همي والاخطار
واليوم بابحر وارتفع ياشراعي