قصيده لفضل الوالدين وحقوقهم والبر بهم ونسأل الله أن يكسبنا البر بهم أحياء وأموات
واقول :
ابدأ ويسهب هاجسي بالقصايد
للوالدين اعز مافي القرابه
في يسر والا يوم شب الوقايد
هم السند واقراب حولك ولابه
في حبهم مافيه ناقص وزايد
خلك لنون العين رمش وحجابه
واليوم خلك مثل لين الوسايد
واقدامهم قبّل بصدق ومهابه
واللي عن الدنيا مروح وغايب
اذكره لاينسيك طولت غيابه
الوقت دار وجايك اليوم عايد
والدين رده حان واكمل نصابه
اللي بغى الجنه ويرجي الفوايد
للوالدين البر واحسب حسابه