ياعم حسين! .. ياعم حسين !!
ادينا حلاوة.. لوزية ..وتوصى شويه !
عم حسين ! راعي الدكان
ايام زمان .. مكانه هنا .. جنب السقا
في البازان .
ياعم حسين ... يقولك ..عثمان ..
جيب لنا
حاجات قديمة !!
حاجات لها قيمة
جيب لنا قلوب سليمة !!
شوف يمكن تلاقي ناس تكون ..رحيمه
تعبنا من الناس ..اللئيمة.
اللي تخلي الحياة .. هزيلة !
وبدال ماتكون عون ..
تكون فرعون!!.. وتخلي الايام حزينة .
تعبنا من الناس اللي كل يوم لها وش !
وحياتها كلها غش !! .
واللي صحبتها ماتساوي.. قرش .
ياستير ايش دا
حتى لا تهش ولاتنش .!!
شوف لنا ضحكة من القلب طالعه
وشمعه في وسط الظلام والعه !!
وسمرة جميلة لين تصير الشمس ساطعة !!
جيب لنا بريالين ..ضحكه حلوه
ومستكه ولبان وحمر جاوه!!
واسطوانه لأي غنوة .
وجيب لنا لدو ومنفوش وجربو
واسكريم النجاح
حتى لو مافي نجاح !!
شوف لنا شي يفرحنا !!
وينعشنا .
شوف لنا ناس !! من حقون زمان !!
ناس كانت طيبه !!
ناس كانت قريبه
ناس كانت عايشه .
ناس كانت كريمة !!؟
ناس كانت بسيطة
وناس بالفطرة !
وعلى السليقة .
تذكرنا بالازقة
كلها فرح وبهجة
ورقة !!
تذكرنا بفرحة العروس
وطيب النفوس
لاهمها ذهب ولا فلوس
ناس طبعها طيب
ومعدنها طيب .
الناس اللي بحق تقول لها ..
(طيب ياطيب) .
ياعم حسين !!ياعم حسين
نبغى شوي من الاشياء القديمة
طفشنا من حياة المدينة .
ايش رايك !؟ تاخذ الناس الجديدة !
وترجع لنا عيشتنا القديمة.