قصيدة ترحيبة بصاحب السمو الملكي الأمير عبدالعزيز بن سعود بن نايف وزير الداخلية بمناسبة قدومه لمنطقة الباحة
يا مرحبا و البث حصري و لايـف
تسمو وتنمو و يتضاعف عددها
مثل الغيوم الغر اذا جت ردايف
ينوض بارقها و يهتف رعدها
يهمل مطرها مثل همس الولايف
و يلبس الأرض الجواهر بردها
سبح لها تطبيق قوقل درايف
يوم الذكاء الاصطناعي رصدها
تمطر على الباحة عـروس المصايف
و يفيض في نجد العذية مددها
في ظل أهل بيض القلوب النظايف
حسامها و لباس جنبه فهدها
رقوا بها في شامخات المشارف
تشوف من باب امسها باب غدها
لين امست الباحة مثل ما انت شايف
تقل خليــة نحل يقطر شهدها
سياحة وعلم ونمو و وظايف
و الله يديم لمنطقتنا سعدها
ديرة رجال ترتكي للمواقف
قد نذرت انفسها لخدمة بلدها
غامد وزهران اهل عزم و معارف
اعز و اكرم ما ترى العين و أدهى
كم من شهيد دون داره مجازف
الروح اذا ضحى بها وش بعدها ؟
و امه على قبره تشل الغطارف
ما كانها تدفن جنازة ولدها
يامرحبا ما طاف بالبيت طايف
عد الفروض و كل وجه سجدها
بعبدالعزيز ابن سعود بن نايف
سمو وزير الداخلية وأسدها
حمى بلاده بالسيوف الرهايف
لو دونها حوض المنية وردها
و الفتنة اللي جرعتنا الحسايف
فصل بسيفه راسها عن جسدها
يالشامخ النادر فريد الوصايف
دهاة عالمنا الحديث انت أحدها
نسل السعود مزبنة كل خايف
أسرة على القمة وحدها وحدها
حرار صيد اوكارها بالنوايف
أسرع من الضوء القياسي هددها
صدورهم للشعب كله مضايف
من ضامته سود الليالي قصدها
و سمي من بالمجد غذى الصحايف
معزي اللي كل قمة صعدها
وحد بلاده في ظروف كلايف
و ارسى قواعدها و ثبت عمدها
و عضيد من خلا الثقايل خفايف
ابو فهد عز البلاد و سندها
-و ولي عهده كاشف كل زايف
غصبا على حقد الكبود و كمدها
له النجاح و للخصوم الحسايف
باقي تموت بغلها من حسدها
كم دولة لولاه راحت خطايف
تعثر و يرفعها و ياخذ بيدها
يوم انتشلها من ركام القذايف
و اطفى براكين الدمار و خمدها
بالقرسنة و الفرسنه و المسايف
يستنزف من اهل المعارك جهدها
فاليوم طاب الشعر و الجو كايف
و الألسن انفكت غوامض عقدها
في مجلس جرة ضيوفه نكايف
من غير قوقل ماب كل يجدها
بيت الرقوش اهل العقول الحصايف
أمجاد هذا البيت كل شهدها
كتبت الابيات بجميل الزخارف
و شاورت أبو صبحي و قال اعتمدها
Screenshot
أ د عبدالواحد سعود الزهراني
عميد كلية التربية بجامعة الباحة
