سفر والسفر غربه واضمد جروح الروح
إذا اشتدت اللوعه بشيٍ من اذكاري
أعمِّر من افكاري من اجل استريح صروح
وعقب ما استريح اشوي تتهدم افكاري
هواجيس مختلفه بسرعه تجي وتروح
تعبر عن احوالي وعن غربة اطواري
بتاره يجيني طاري الغالي المملوح
وارتب له اشعاري وباقه من ازهاري
وتاره أشوف إن الغلا بيننا مذبوح
إذا بحت من شأنه بتنهيده اسراري
وتاره اقول الشعر مالي منه مصلوح
إذا كان ترديده يسبب عنى القاري
تحلق بي افكاري وانا ثاوي ومطروح
ويضوي غياهب غربتي نجمي الساري
اقاوم تباريحي واقل يا زمن مسموح
واحاول أرمم طيحتي وانظم اشعاري
واغني ويقتل لحنها صوتي المبحوح
واتمتم بها ويغيثني دمعي الجاري
ويغسل بقايا لوعتي دمعي المسفوح
واضمد جروح الروح واتمم اسفاري
السبت 1441/2/20هـ
[audio ogg="https://aan-news.com/wp-content/uploads/2019/10/WhatsApp-Audio-2019-10-19-at-1.02.30-PM.ogg"][/audio]
