يا بو عمر والليل يسري ولا امسيت
من هاجس ٍ وسط الحنايا بلاني
ناش الخفوق اللي تعنى ولا اطريت
واشعل بوسطه نار يصلى كواني
سرى بفكري وادلج الهم حسيت
كنه على عهد المواصل نواني
لاع المسهد واحمر الدمع هليت
مثل المزون اليا انهمل ماكفاني
حاولت اداري ما غمرني وكفيت
والروح من لاهب عناها تعاني
وتسبقني الرعشه مع كثر ما اخفيت
وكن الليالي اللي مضت ماتباني
سرت بي الذكرى ولو قلت ما اخفيت
وهج سنين ٍ من حياتي ضواني
عانيت في الدنيا ويا كثر ما ازريت
ظلم القرايب لا تمادى شقاني
اصخيت من مالي ولا كني اصخيت
وامسيت مع كثر العطا في العياني
بذلت لين اللي عطيته ترجيت
واصبح كريم النفس يشكي الهواني
ما قدروا نفس ٍ تعنت ولا اشقيت
وزادت حمولي في عذابي تباني
شالت متوني كل همي وقفيت
وسريت في ليل العنا بالاماني
وان طوعوا نفسي وبالغدر مريت
منهوب مال وعقل وكل ٍ غزاني
ناشوا الضحية ما بقى ما تمنيت
وكني عدو ومغنم ٍ يا زماني
الله على جور ٍ غدى بي وناديت
نصر العظيم اللي دعيته هداني
يرجيك يا ربي لمظلوم شافيت
يطلبك ميزان العدل في بياني
ما راح من عمري ومالي وما اعطيت
تاخذ لي الحق من اهلي وعدواني
وتشوف عيني قبل موتي اذا احييت
ميزان عدلك وما كتبته يباني
………………………………………………….
الشاعر : عائض سعيد عايض آل شبيلي القرني
الإثنين ، جدة – 2026/1/5م
