تغيبت لكن ما تغيبت دون اسباب
ظروفٍ خذتني واجبرتني على الغيبه
تعلمت كيف اشتاق لاحبابي الغياب
واخذت الحصانه من زماني والاعيبه
وجمر يثير الشوق في خافقي شباب
إذا هب طاري صاحبي قام يضوي به
يدق الهوى بابي واقول الهوى كذاب
وأقوم افتحه والقى عناه ولواهيبه
لك الله يا وقتٍ حداني عن الاحباب
على بعدهم دارت بقلبي دواليبه
حبيبي ترى الغربه لها مخلبين وناب
وبعدك غرس نابه وجود مخاليبه
بقلب ٍ ندي دايم على شوفتك وثاب
بنبضه وحبه واندفاعه وترحيبه
حبيبي ترى ما ني بذاك الوسيم الشاب
حداني فراقك للمشيب وعذاريبه
ولكن شعوري بالمحبه أبد ما شاب
ولي قلب ما بين المحبين أماري به
صحيح إن جرحه حي من غربته ما طاب
وقلب ٍ يعاني هم وش لك بتعذيبه
مساكين من عاشوا مع العاشقين أغراب
يعانون من وحده ولوعه وتغريبه
يعيشون بين انياب حقد وشريعة غاب
وهم ينثرون العشق والود والطيبه
فلا يصرفك عن حبي المازح الكذاب
ولا يخدعك معسول هرجه وأكاذيبه
أنا بنشدك هذا النوى بيننا وش جاب
سوى الصد والحرمان والشك والريبه
ترى القلب مهما صار عن شوفتك ما تاب
ولو طال مشواري وليلي عوى ذيبه
تفضل بعطفك وامسح الدمع لامن ذاب
وحدَّر على الخد وغشتني غواريبه
الشاعر : سعيد عبدالله الغامدي
أسير الطيب